يوم المهنة . . / يوم أن قدّمت على وظيفة (H) . . 2009/05/19

ترا العنوان المفروض يصير ( يوم أن قـُدِم َ لي على وظيفة ) بس للتشويق كتبت قدّمت اكشخ يعني

أولآ . .

سأعرّف بيوم المهنة

يوم المهنة مناسبة وطنية تمتد ليومين تعقد للمرة الأولى للطالبات في رحاب جامعة الإمام محمد بن سعود الإسلامية، لتلتقي فيها الجهات النسائية المختلفة مع الخريجات لمساعدتهن في تحديد وجهاتهن وتعريفهن بفرص العمل والتدريب المتوفرة توفيراً للوقت والجهد. وذلك تجسيدا لدور الجامعة في المجتمع وتحقيقاً للتعاون مع الجهات المختلفة لتوظيف المواطنات السعوديات من خريجات الجامعة والتعريف بتخصصات الجامعة المختلفة بشكل أفضل ..

كان يوم المهنة الاثنين / الثلاثاء .. 23 – 24 / 5 / 1430 هـ ..

بالجامعة – فرع الملز

فيه دورآت ومعارض وحركاااات .. وفيه تقديم على وظايف

للتفاصيل انقر هنا

الحاصل . . اني أنا وصديقاتي قلنا خن نسجل بالدورات

من باب انهم بيحضّروننا بمحاضراتنا وحنا ماحضرنا ومن باب اننا نروح للملز نوسع صدورنا ونشوف صديقاتنا اللي هناك <هذا مربط الفرس اصلآ

توكلنا على الله وسجلنا بالنت بدورة ( التفكير الإيجابي )

ومن بكرا رحنا للجامعه نأكد التسجيل وندفع الرسوم <يازين الوثوق

رحنا للجامعة وقعدنا نحتري المسؤلة سنه ، وتأخرنا عن المحاضرة ..

وآخر شيء قالوا لنا انهم اكتفوا وتقفل التسجيل

خساااره كان ودّي ارووح

ابي اشوف هاجر ومنال وكل الناس

بس يله خيره

المهم جا اليوم اللي هو يوم المهنه

والبنت اللي اسمها شروق بتروح للملز مع الإرشاد الاكاديمي

جت الصبح سولفنا وقالت بروح يله ..

قلت ايييييييييييه صصصصصصحححححححححححح شووووووفي هااااااااجر

قالت ايه ايه ايه اررررسلي لها خل اشووووفهااااا ابي اطططقها <الله من زين الاغراءات

ارسلت لهاجر قلت لها ان شروق مشتاقة لها وتبي تشوفها وتبي تطقها

لو أنا هاجر ما رحت اشوف شروق < ابد ما يخوّف طقها

فجأة من الفجئات ، ارسلت لي هاجر تقول قدمت لكم على وظيفه تخرجوا لا تفشلوني

يوم جا الظهر جت شروق من الملز

وقعدنا نآخذ الأخبار

قالت قدددمنا لك على وظيفة

هاه . . جادين ؟

قالت ايييييييه والله العظظظيم قدمنا لك ، كتبنا اسمك وكل شيء ..

قلت وشو ويييين ؟

قالت بمدارس الفرسان تهاوشنا على اسم ابوك وكنت بكتب لك ( ابلى ) بس كتبنا ( استااذة دين )

والله رجعت للبيت وأنا احتريهم يدقون علي يقولون تعالي داومي يا استاذة

<<

،

” مذكرآت أستاذة -5- ..، 2009/05/18

من زمان ما كتبت شيء عن التطبيق

لأنه معد فيه شيء جديد ومميز ، صار التدريس شيء عادي وروتيني راحت هيبته

هالاسبوع .. السبت 21 / 5 / 1430

كنت بتقيّم للمره الثالثه ، <باقي لي تقييم واحد بس

عندي درس فقه [ الهبه ] ، عند ثاني علمي

كان أحلىىى درس مر عليّ ، اول مره اطلع مستاااانسه من قلبي

حصتي كانت الثالثه ، وجايه ماجهزت تمهيد !

مدري وش اقول

عاد الحمد لله أنا وصديقاتي نفس الدرس ، لقيت وحدة مجهزه تمهيد وسويت مثلها

احس المشرفه تطفششش منّا تحضر الدرس كم مره وكلنا نفس القصص ونفس التمهيد ونفس التطبيق

المهم رن جرس الحصه الثالثه < حصتي

رحت وقفت عند الباب احتري الاوضاع تركد

دخلت

السلاام علييييكم ..

<اناظرهم

بسم الله والحمد لله والصلاة والسلاام على رسول الله ..

بقول لكم قصة <يالييييل ، احس المشرفه تقول صجتنا ذي بالقصص

فيه رجالين ، واحد غننني والثاني متوسط الحال <<رجالين اجل كل كلامي عامي مع ان المشرفه تبي تصفقني من كثر ماتنقدني ولا افهم كل ما قلت لها انقديني قالت زين بس تتكلمين عااامي مررره

المهم نرجع للقصه

فيه رجالين واحد غني والثاني متوسط ، المتوسط يبي يتزوج

< يوم قلت يبي يتزوج كللللللل البنات ركزوا معي بالقصه

الغني وَهَبْ اللي بيتزوج مسكن ..

بايش يكون الغني ساعده ؟

- ببيت .. – شقه .. – مسكن ..

طيب مسكن بس وش يعتبر ؟

- هديه .. – هبببه .. <اللي قالت هبه فاتحه الكتاب
صصصصح هبببه .. وهذا هو درسنااا اليوووم

الهبه

^ ع السبورة كتبتها

فجأة .. مجموعه بالزاويه حركيييين مره انفجروا بالضحك

بديت اشرح وهم يضحون .. ناظرتهم كم مره واشرت لهم ، بس ما زالوا يكتمون ضحكتهم ويضحكون

وانا اشرح رجعت لهم ورا وكنت اشرح واناظرهم

يوم خلصت الفقره قلت ترا بفرقكم

ومازلوا يضحكووووون ووحده منهم تحاول تتكلم ، قالت : لاااا .. يا .. استااااذه .. والله .. والله بعلمك .. ليش نضح.. نضحك ، لأن هذي اللي جنبي

وانا متحمسه بعرف السبب

قالت : لأن اللي جنبي ، اسمها هبه

قهروني ، سخيفين ، طيب اسمها هبه مثل اسم الدرس وش فيها !!

انقهرت ورجعت قدام وقعدت اكمل شرح

الهبه هي الهديه وهي تختلف عن الصدقة

فيه بنتين قدام مره يقطون معي بالشرح تحسين ودهم يشرحون عني

وحده من صديقاتي كم مره تشرح لهالفصل ، وقالت لي انه البنت السودانيه اللي قدام بس تسأأأل ، تتورطين اذا ماعرفتي تجاوبين يعني ما شاء الله البنت فاهمه وتسأل عن كل شيء

المهم قطوا معي يقولون لان الصدقه ينتظر ثوابها من الله … الخ

قلت احسنتم ممتازين

طيب بقول لكم قصة تبيّن ان الهديه شيء والصدقة شيء ثاني

تعرفون سلمان الفارسي ؟

ايييه

من وين أي بلاد ؟ من اسمه واضح ،

بلاد فاارس

طيب وش ديانتهم ؟

مجوس

احسنتم المجوس يعبدون النار .. وكان سلمان هو ووالده من يوقدان النار للناس ليعبدوها !

وكان يتعجب ودائمآ يفكر .. كيف نعبد شيء حنا نتحكم فيه !

متى ما اردنا اشعلناها ومتى ما اردنا اطفئناها ، وإذا نقص الحطب قلت واذا زاد زادت ..!

فكان سلمان دائمآ يفكر ويحاول أن يجد الدين الحق ،

في يوم من الأيام ، مرت قافله من الشام ..

فهرب معها !

ذهب إلى الشام ، والتقى براهب نصراني .. وصار يتعبّد مع هذا الراهب

يوم جاء الراهب بيموت <اموت ع الاسلوب مدري انا كنت كذا اشرح للبنات ولا اسلوبي احسن

سأله سلمان ، قال وين اروح بعدك ؟ وش اتخذ دين ؟

قال الراهب : لا أعلم دين أفضل من هذا ، إلا انه سيبعث نبي في جزيرة العرب ، ودينه افضل الاديان

وله ثلاث علامات :

- انه لا يأكل الصدقة

- وانه يأكل الهدية

- وبين كتفيه ختم النبوّة

فذهب سلمان الى جزيرة العرب وأخذ يبحث عن النبي صلى الله عليه وسلم حتى عرفه ..

فصار يراقبه ليتأكد من الثلاث علامات ..

وكان سلمان يعمل في حقل ..

فجاء مره الى النبي وقدّم له تمر ، فلما وضعه بين يديه قال : هذه صدقه !

ثم أخذ يراقب ..

لاحظ أن النبي دعا أصحابه وكانوا يأكلون لكنه لم يمد يده الى التمر قط

فقال في نفسه : هذه الأولى ..

وجاء في يوم آخر وقدّم إلى النبي صلى الله عليه وسلم ، إناء فيه تمر

فلما وضعه بين يديه قال : هذه هدية !

وأخذ يراقب . . دعا النبي اصحابه وكان يأكل معهم ..

فقال في نفسه : هذه الثانية ..

وكان دائمآ يحاول ان يرى ختم النبوة . . حتى أحس النبي صلى الله عليه وسلم بذلك ، فأرخى له ردائه ..

فلما رآه أسسسسلم رضي الله عنه <تقل تدرّس ابتدائي على هالحماس

فمااااذااا نستفيييد من هذه القصه ؟

- أن الهديه تختلف عن الصدقة ، وأن النبي لا يأكل الصدقه لكنه يأكل الهديه ،

ممممممتاااازه

طيب من تعيد لي تعريف الهبه ؟

- لغةً : مأخوذه من هبوب الريح أي مرورها ، وهب يهب وهبآ أي اعطاه بلا عوض .. والاستيهاب : طلب الهبه وسؤالها ..

- اصطلاحآ: التبرع بالمال في حال الحياة

احسنتم .. طيب نأخذ شروط الهبه ..

سألتني اللي قدام <اللي دايم تسأل

قالت طيب يا استاذه يقولون “الهديه لا ترد ولا تهدى” ؟

قلت : حلوو هذي النقطه بنجيها بعد شوي ان شاء الله ، اصبري

< حممممممممدت رررررررررررربي اني محضّره هالنقطه بالذااات هي مب موجوده بالدرس انا جبتها شيء خارجي من عندي الحمدد لله انها سألتني ولا سألتني شيء ثاني ما اعرفه

من تعرف شروط الهبه ؟

ولا وحده ؟!

طيب .. لو جاء اخوكِ الصغير واعطاك ششيء من اشيائه وقال لك هذي هديه ..

هل تعتبر هبه ؟

- لاااااا

صححححح ، طيب ليش ؟

- لأنها مستعمله

لااا غلط ، عادي الهديه تكون مستعمله ، سبب ثاني ؟

- لأنه صغير

احسسسسنتي ، إذآ يجب أن يكون الواهب جائز التصرف ، فلا تصح من الصغير ولا المجنون ..

طيب الشرط الثاني ؟

لو جيت واخذت من أغراضك شيء [ وسحبت مقلمة بنت ] وقلت هذي لي هديه لي

هل تعتبر هبه ولا لا ؟

- لاااااا

طيب ليش ؟

لانها غصب

ههههه صح ، يعني انتي راضيه ولا لا ؟

- لااا

إذآ ، الشرط الثاني أن يكون الواهب مختارآ غير مكره

طيب الشرط الثالث

لو عطيتك هديه [ ومديت لوحده القلم اللي معي ] وقلت لك هذي هديه .. بعدين قلت : لااا لااا أمززززح [ وسحبته منها ]

قاموا يضحكون – خييييرررر خخخخ

قلت هل تعتبر هبه ؟

- لااااا

الشرط الثالث ، ان يكون الواهب جادآ غير هازل

يلا من تعيد لي الشروط ؟

–

طيب وحده تو تسأل .. مقولة “الهديه لا ترد ولا تهدى” أو “الهديه لا تباع ولا تهدى” صحيحة ولا لا ؟

- صحييييحه .. – الا صصصصحححح عيييب .. – عيب عيب ..

ما ابي عيب ! أقصد لها أصل شرعي ولا لا ؟

- .. - .. – لا !

صح ما لها أصل شرعي ! إذا العبارة غير صحيحه .. لأنه يجوز آن تباع الهديه أو يُتصدّق بها ، لكن على غير صاحبها ..

واذكر قصة عمر بن الخطاب رضي الله عنه ..

مره اهدى رجل فرسآ . ثم رآها تباع بالسوق برخص :/

فأراد أن يشتريها ، ذهب يسأل النبي صلى الله عليه وسلم ..

فقال له : لا تشتريها ولو أعطاك بدرهم !

فلا يجوز شراء الهديه من صاحبها ..

خلصتْ الدرس ..

وطلعت لهم التطبيق ..

وعطيتهم الهدايا ..

تعبت وأنا ازينهم .. كنت سهرانه عليهم اخيطهم حبه حبه

وكنت الصق عليهم الأشكال الجميلة حبةً حبة وأدخل الحلاو حلاوة ً حلاوة

ثم كتبت الملخص والواجب ..

وطلعت المشرفه ..

يوم طلعت قالوا يا استااااااذه ما نبي واجب :/

قلت حلوه الحين سهل !

قالوا اصلاآآ ما عندنا دفاتر

قلت ماعندكم ؟ <ادري انهم نصابين بس استغبي عليهم مثل مايستغبون علي

قالوا لا<اغبياء فرحوا اني صدقتهم

قلت ماعنننندكم ! اكيييد ؟

قالوا خلاص بنحل خلاص ..

بيت جديد .. 2009/05/16

السلااام عليكم ورحمة الله ..

تمـ الإنتقال إلى هذه المدونة الجديدة

مدونتي القديمة هنا

نقلت كل اللي هناك إلى هنا عجزت اتركه

حيآكم الله ،

،

" مذكرآت أستاذة -4- ..، 2009/05/16

بسم الله

الحمد لله والصلاة والسلآم على رسول الله ..

ان التدريس جميل

<< والله المتقلبه يوم زين ويوم شين ..

طيب خل اعلمكم وش صار لي عشان يصير التدريس جميل ..

اول شيء دخلت للمدرسه متأأأخره ، دخلت وآآآخر طابور يرقون :/

اليوم حنا مسوين الاذاعة عن الابتسامه وجايبين بطاقات نوزعها ع البنات

كنت مسويه زحمة لصديقاتي وبس اهددهم لا تتأخرون ولا تتأخرون .. آخر شيء انا اللي تأخرت

قسم يوم دخلت وشفت البنات رقوا تحطمممممممممممت

المشكله ان كل العفش معي ، سلات التوزيع واللابتوب وعفشي وااااااااجد

وصح اني قمت متأخره بس حاولت بقدر الامكان اني اطلع بدري

بس الله يصلح اخواني

المهم دخلت متأخره وبلعت نظراتهم لي

حسيتهم بيصفقوني

صرفتها وقلت اااااء هههه معليش نوزع بالفسحه ونشغل الانشودة بالفسحه

رقيت وبدينا موال تقديم الحصص

انا ماسكه ٢ علمي وحصتي السابعه

بقدمها ماقدرت ، مافيه أمل

قلنا خيره

اذا تذكرت الدرس والمشرفه توترت شوي وشلت هم ، واحيانآ يجيني تبلد

الحصه الثالثه رقيت لاولى ادور البنات اللي ماسكين معنا النشاط

قالوا لي انهم بالتدبير تحت

شلت عفشي ونزلت

قلت لهم يجون قبل الفسحه يآخذون السلال ويوزعون وانا بجلس بغرفة الإذاعة اشغل الانشودة

رحت للاداره قلت لهم اني بستخدم المايك ، شغلناه وجلسنا

مشت الامور على خير ولله الحمد

بعد الفسحه كالعاده رحنا نآخذ حصص لبكرا والاسبوع الجاي

الوقت كان بطيييييييء

ابي السابعه تجي عشان افتك من حصتي

من الحصه الخامسه بدأ الخمول يتسرّب إليّ

وبدأ النوم يغزو اجفاني

واصبحت دااااااآآآااايخه

وشلون بشرح !

يانفسي بال سخافه صحصحي

عيت تصحصح

جت السابعه بعد طول انتظااار :/

كنت خايفه شوي

رحت للفصل وجت عهود تحضر لي

دخلت لقيت الفصل فااضي ، قعدت احتريهم ، وعهود تمسح لي السبورة

كل يوم بخليها تحضر لي خدماتها ممتازة ، تشيل الكيس وتمسح السبورة وتحط كرسي للمشرفه

صارت عهود فايف ستار

المهم احتري احتري لين بدو يجون

قلت وينكم ؟

قالوا بغرفة المصادر ..

جو نصهم ، ارسلت بنت تنادي النص الثاني

والمشرفه برا تحتريني اضبطهم عشان تدخل

جلستهم وجت البنت قالت انه باقي بس ٣ بنات مايبون يحضرون

قالت المشرفه بروح اشوفهم ،

راحت ودخلت اضبط الفصل

جلستهم بعدين بدو يشغلون المكيف ويعلونه ويقصرونه

يوم هجدوا جت المشرفه ، قالت خلاص مب حاضرين الـ٣ بنات ابدي

ودخلتْ

سكرت الباب وسلمت

بسم الله والحمد لله والصلاة والسلام على رسول الله ..

قبل الدرس ، بقول لكم قصة

تذكر لي وحدة قصة خادمه عندهم [ الوحدة هي عهود اللي قاعده ورا بغيت اقول لهم ترا هذي هي ]

تقول كانت الخادمه جالسه تغسل المواعين ، جتها رساله

خلتها وكملت غسيل ، فجأة ..

طاح الكأس وانكسر ، انهبلت وقعدت تصيح وتقول اكيييييد بالرساله شيء شين عشان كذا انكسر الكأس ..

- هءءءء اسسسستغفر الله

ليش تتوقعون انكسر الكأس ؟ هل هو فعلآ انكسر عشان الرساله فيها شيء شين ؟

- لاااااا كذا انكسر قضاء وقدر ..

<< فاتحين الكتاب وعارفين الدرس

- طيب وش ينقص الخادمه ؟ ليش تشائمت ؟

- ايمان ، ينقصها ايمان ، ايمان بالقضاء والقدر ..

- احسنتوووو ينقصها ايمان ، طيب ايمان بايش ؟ اي اركان الايمان اللي ينقصها ؟

- الايمان بالقضاء والقدر ،

- ممتاااازييييين ، طيب الايمان بالقضاء والقدر من اركان ايش ؟

- الايمان ..

- احسنتتتتي ، هو الركن السادس من اركان الايمان ، من تعدد لي اركان الايمااااان ؟

- الايمان بالله وملائكته وكتبه ورسله واليوم الآخر والقدر خيره وشره

- ممتااااازة ، احسنتتتتي ، هذا في حديث الرسول صلى الله عليه وسلم عندما سأله جبريل ما الايمان ؟ قال ان تؤمن بالله وملائكته وكتبه ………. الخ

^ دخلت جو بالشرح

المهم اني شرحت الدرس

المغناطيسات ورطتني ماتلصق بقووة وكان المكيف ع السبوره فتورطت زياده كل ما علقت ورقة طاارت

خل اوريكم صورة المغناطيسات

طبعآ صورتها وهي مقشعه عقب بنات اولى مازينتها

اولآ هذي مقلمتي وانا ابلااا

وهذي اغراضي

وهذي المغناطيساات

طبعآ مب واضح وش كنت راسمه

وهذي مغناطيسات مرسوم عليها هديه من عهود

<< من كثر ما صجيتهم اني ادور سمايلات ، اول ماشافتها اشترتها لي

بعد ما خلصت الدرس وكتبت الملخص والواجب

كنت جايبه علبتين ، وحده فيها حلاو مصاص ومعلق عليها اوراق اسئلة التطبيق

والثانية فيها حلاو بيض ومعلق عليها اوراق مكتوب عليها فائدة << هذي هدية للي تجاوب وزعت عليهم الحلاو مصاص وقلت اللي اخذت تقوم تقرأ السؤال وتقوم بنت تجاوب تحمسسسسوا يوم شافوا الحلاو وصاروا يتهاوشون يبون يقومون هع

خلصنا وطلعت المشرفه ..

يوم طلعت لقيت باقي حلاو كثير ، قلت من اللي شاركت وماعطيتها حلاو ؟

قاموا انا انا انا انا

وزعت عليهم كللللهم ، مع اني جايبه حلاو شوي الا انه صار قدهم :p

وبهذه المناسبه يجدر بي ان اخبركم ان اليوم نص المدرسه غايبين لانه يوم الغياب العالمي كما وصلني ع الايميل

وزعت الحلاو عليهم كلهم ، الا بنت كانت طول الحصه نايمه

وانا اوزع كانت نايمه بعد

يوم خلصت قلت خلاص اللي بتطلع تطلع << انا اول مادخلت عليهم قلت لهم ان الدرس قصير فخلونا نخلص عشان اطلعكم بدري

فجأة فتحت البنت النايمه

وشافت الناس معهم حلويااات وكنهم بالعيد

وقامت تسألهم وقالوا لها انه مني

انا كنت جالسه اضف اغراضي وباقي حلاوة مصاص وحدة بسسس

قالت استاااااااذة أنا ماعطيتيني حلاو

قلت انتي نايمه يختي

قالت لاااا والله العظيييم اني تعبااااانه قسم بالله

قلت طيب سلاامتك ما تشوفين شر ، عاد حظك باقي حبه بس لك

-

عاد المره الجايه صحصحي لا تنامين

- ان شاااء الله ششششكرآآآ يا استاااذه

قاموا نصهم طلعوا ونصهم يضفون عفشهم

وكل ماجت وحدة تطلع تتشكر ع الحلاو

ياخي حسيت اني موزعه عليهم ذهب

كل يوم بجيب لهم حلوياااات

وكل يوم بوزع على كل الفصل مب بس اللي يشاركون

طبعآ المشاركات حلاو مميز والباقين حلاو مصاص

هذي صور الحلاو اللي وزعت عليهم

اللي شاركوا عطيتهم حلاو بيض مغلفينه خواتي بقماش ابيض ومرسمين عليه

صفيته بسله فيها ورق كنه قش

وكل وحدة معلق فيها فائدة عن القضاء والقدر

وحلاو المصاص ماصورته ، كان معلق عليه الاسئلة

صورت حلاو المصاص نفسه بتوزيع المصلى ، تشوفونه ان شاء الله بتدوينة نشاط المصلى ، إذا رزقني الله فوتو ان شاء الله

<< ادعوا لي الله يرزفني فوتو جمييل

والسلآم خير ختام ..

تراني افرح إذا رد أحد ، احس اني اتكلم لاحد يسمعني ما اكلم نفسي

شكلي بعطي إلهام وسام على ردودها

لا شكلي بسوي مسابقه اللي ترد كل يوم بعطيها حلاو

" مذكرآت أستاذة -3- ..، 2009/05/16

السبت ٢٢ / ٤

دخلت المدرسه ، كنت تعبااااانه مانمت جالسه احضّر وازين هدايا ، لان المشرفه بتحضر لي

عندي ثاني علمي توحيد ، الحصة الرابعه

كنت ناويه اقدّم الحصه بس هونت قلت خل اقعد احفظ الدرس احسن لي

دخلت الغرفه ، استقبلوني بخبر جميييل جدآ

قالوا ان استاذة المادة رفضت نآخذ حصتها ، حاولوا فيها ، يابنت عندنا تقييم ومحضرين وكلش

وهي رااافضه ، كلمتها المشرفه ، معييه مرره

عصبنا وقلنا ان عمرنا اخذنا منها خليها هي وحصصها

مب اول مره تسوي فينا هالحركه ، يعني خلاص شطبنا عليها مره

قعدنا نسولف ونكمل دفاتر التحضير ، كننا نحل واجباتنا وحنا نحضر

قالت لنا المشرفه خوذوا حصص لبكرا بدون تقييم ..

رحنا للاستاذات نآخذ حصص ، حنا ثنتين ، قررنا نآخذ حصة قرآن عشان مانحضّر ولا شيء

دخلنا غرفة المعلمات ، كانوا ساكتييين وهدووء

احس لو جيناهم نسوي لهم اكشن هع

سألنا الاستاذة الاولى ، وش عندك بكرا حصة قرآن ؟

متى واي فصل ؟

قالت عندي ثاني قالت صديقتي انا ابيهم محجوزين

قمت انا سألت الاستاذة الثانية عن حصصها

قالت : عندي بكرا اولى

قلت : لااااااااا لاااااااا لااااا لااااا لاااااا لاااا لااااا اولى ما ابيهم ما ابيهم هونت ما ابي حصص ابد

فجأة ، كللللللللللللهم قعدوا يضحكون

وش السالفه ليش تضحكون

قالت صديقتي ، هههههههههههه يالخببببببله مب اولى ، تقول لك الحصصصصصه الاولى

احم

طاح وجهي

قاموا المعلمات يعلقون عليّ :/

ما تبين اوولى ، لهالدرجه متعقدّه منهم ؟

قالت استاذة الحديث حقت اولى : انتي اي فصل اخذتي ؟

قلت : اولى سادس

قالوا : اووولى سااااادس ، بعذذذذذذذذرك ، هذولا ما ينمسكووون وش طيحك عليهم

قلت : الحممممممممممممممممممممممممد لله طلع البلا مب فيني ياربي لك الحمد

المهم اخذت حصة قرآن عند ثالث ادبي الحصة الاولى ..

–

وحنا بغرفة المدرسات

يدت الحصه السابعه

جتنا استاذة التوحيد اللي ماسكه اولى

قالت معليش تراقبون معي ؟

قلنا : ايه عادي ماعندنا شيء

قالت يلا تعالوا الله يعافيكم لاولى رابع ، هذي الاسئلة

رحنا

اعشق امسك اختبار عشان يصير مصيرهم بيدي ويصيرون مؤدبين

دخلت قلت يلاا اختبار توحيد وزعوا طاولاتكم ..

قاموا يصجون يللله وززعي

قلت اول زينوا طاولاتكم

وقمت ارتبهم

مشكلتي دقيقه وما اقدر اخلي طابور مايل شوي

فغثيتهم وانا ارتبهم

وزعت الاوراق ووقفت ورا

لفتوا نظري بنتين قدام عليهم حركااات

قمت جيت قدام وقلت لصديقتي روحي ورا

وقفت عندهم ، يناظرون بعض ويتضاحكون

وانا اناظرهم

المشكله اني فوق روسهم

بعدين صاروا يتلفتون لبعض بزياده

واطق على طاولاتهم ><

بعد شوي كتبت وحده ع الطاوله شيء

قلت خيرررررر :@

قالت والللللللللللللللللله ماكتبت شيء قسسسسم بالله تعالي اقري

قلت طيب خلاص بلا حركاات انتي واياها

قالوا قسسم ما سوينا شيء

طيب خلاص اسكتوا ><

وكل ما ناظرتهم ضحكوا ، رفعوا ضغطي

وحده منهم قهرتني وهي تتلفت

هاوشتها

قالت وشششو بسسس ابي بداية الآية بسسسس

قلت ايييشششششششششششش

قالت تكفيييييين تكفييييييين ابي بداية الآية

قلت خييييييررررر تغشييين

قالت لااا والله ما اغش بس ابي البداية

انا تننننحت

مدري هذولا من وين يفهمون

جيل غريب عجيب !

—-

خلص الاختبار وجت استاذتهم وطلعتْ برا الفصل

ماصدقت اطلع واسكر الباب عليهم تركيت ع الباب اتنفسسس

اولى هذولا سبحان الله ما احبهم

لفيت ع اليسار ..

انصعقت

لقيت مجموعة بنات من اولى اول طالعين

ووحدة منهم شعرها قصييير ورافعه مريولها الى فوق الركبة ولابسه بنطلون تحتها !

والبنات متجمعين ..

احترق ودي اهاوشهم بس خفت يصفقوني

لفيت عليهم بكامل جسمي وتكتفت وجلست اتفرج عليهم

يوم تأكدت تمامآ انها لابسه بنطلون ورافعه مريولها مشيت

<< عييت اصدق اول ما شفتها

رحت لغرفتنا ، اللي هي غرفة المراقبات ..

جلست اظف عفشي ، واسمع المراقبتين يتكلمون

ماكنت اسمع وش يقولون ، يعني مو مركزة

بس حسيت انهم يتكلمون عن شغب حاصل فقلت بقولوهم وش شفت :p

- تو بنات اولى مجتمعين على بنت [ رفعت راسي عشان اشوف ردة فعلهم للحدث ، يعني تقدرون تقولون بشوف هو شيء طبيعي عندهم ولا لا ] رافعه مريولها مررره شوي وتفصخه وتحتها بنطلون ..

- ايييه هذي البنت نتكلم عنها تو ..

< يحسبوني معهم وهم يتكلمون -ـ-

حسيت اني بريت ذمتي شلت عفشي وطلعت ..

—

الأحد ٢٣ / ٤

قمت مرررررره متأأخره

وانا عندي حصه الاولى

قد قالت لنا وحدة من المراقبات ، انتم تأخرون ماتجون قبل الطابور ..

قلنا الله أكبر ، اهم شيء اننا نجي وشوله نجي بدري وحنا ماعندنا شيء واصلآ مب معلمات اساسيات

قالت لا بس انتم معلمات المستقبل ، المفروض تنضبطون

عاد كل الشله اللي معي ولاا وحده تفكر تصير معلمه ، ولا تكمل دراستها

خخخ كلنا فاشلين علميآ

المهم دخلت المدرسه على ٧ ..

والبنات داخلين فصولهم ..

دخلت بوقع ، الا اللي معها الجداول تقول ثالث ادبي ماعندهم احد !

تداركت الموقف وحمدت ربي اني ما تأخرت زيادة ، قلت الا الا انا عندهم

قالت افااا متأأخره :p

قلت دقيييقه توها تبدأ الحصه بس اوقع واروح لهم ان شاء الله

وقعت وفصخت عبايتي ورحت للفصل

طبعآ حصة قرآن ، كنت متورطه مدري وش اسوي بالحصه ،

يعني مدري اقرأ واخليهم يقرون وبعدين ؟

واذا خلصت بدري مررره وش اسوي بالوقت الباقي :p

وقفت تفكيري وخليت كلش يمشي تساهيل من الله :p

رحت للفصل وقفت شوي ع الباب

بعدين دخلت وسلمت ..

البنات حليوات خاصه اننا الصبح مابعد تنشطوا هع

قلت لهم طلعوا مصاحفكم

وبديت اقرأ

قريت نص وجه وخليت البنات يكملون

بعدين قلت يلا اقروا جماعه ..

قالوا لاااااااااااا يا استاااذةمب كذاااا !

قلت اجل شلون ؟

قالوا اقسمينا مجموعتين وكل مجموعه يقرون آيه

قلت طيب يلاا

واشرت خط بنص الفصل ، قلت اللي ع اليمين مجموعه واللي ع اليسار مجموعه

قالوا لاااااااااااا غششش اللي ع اليسار مره شويين لازم نصير قد بعض

لااا حوول ولا قوة الا بالله ، وش ذا الورطه !

قلت لاا معليش ، مب المسألة من اكثر ، المسألة من يقرأ احسن

ونشبت بهم الا ينقسمون بالنص ، وهم ناشبين الا اخليهم قد بعض

بس فزت عليهم عشاني انا الابلا لازم افوز

خلصنا قراءة وقلت لهم خلاص خلصت الحصه

قالوا الله وناااسه خلصنا بدررري

وبدوا يستأذنون اللي بتروح لابلا فلانه واللي تبي تسأل عن اختبار … الخ

وانا اطلعهم ما اقول لا ، احسهم يستانسوووون عليّ ما اعيي على احد

جلست اسولف معهم ،

يسألوني ليش دخلتي دين ؟ دخلتيه وانتي تبينه ولا مغصوبه ؟

قلت لااا شدعوه اكيد ابيه ليش مغصوبه

قالوا طيب بعدين ؟ وش تبين فيه وش تصيرين ؟ تبين تدرّسين ؟

قلت لاااا مستحيل ولا افكر ادخل نطاق التعليم ..

قالوا اجل حسااافه وشوله دارسه وتعبانه

قلت كذا دارسته لنفسي مب لازم لوظيفه ^^

سألتني وحدة

- استاااذه وش اسمك ؟

- غادة

- ما شاء الله كلكم غادة وغيداء

<< غيداء صديقتي مدرّستهم

- طيب غيداء وش عائلتها ؟

- الـ ….

قاموا يضحكوووون فرحانين

- ليش

- لأننا سألناها وعيت تعلمنا

هههههه مهابيل :p

طبعآ سألوني وش عائلتك ؟

علمتهم

قالت وحدة انتم من القصيم ؟

قلت ايه ^^

قالت ياحلييييلكم يا استاذة نعرفكم

قلت بالله ؟ من تعرفون ؟

قالت بنت عم اخت جد مدري من هي مآخذ منكم ومدري وشو

قالت شيء مافهمته يعني :p

يقولون لي وناااااسه يا استاذه ما كنها حصه

قلت حصه قرآن اكيد خفيفه وش اسوي يعني

خلصت الحصه وطلعت ..

اخذت شنطتي ورقيت غرفتنا

جلسنا وسولفنا وخلصنا اشغال ..

فجأة جت بنت

هااااااااديه وساااكته

قالوا لها وش اللي سويتيه

وقاموا يهاوشونها ياللي فيك ومافيك وماتستحين وترا سكتنا لك واجد ومدري ايش

وهي سااااكته بكل هدوووء

كملوا هواش ، ومايكفي طيحتي لوحة الاستاذه ذاك اليوم و….

فجأة صررررررخت : ماااااااااطيحت اللووووووحه لااااا تظلمييييييييييييييييننننييييي

حسيت الهدوء كان ماقبل العاصفه

- الا طيحتيها ، اجل من طيحها !!

- اقووولك ما طيحتها ما تفهمين ، لاا تظلميني

- مب بس اللوحه دايم حركاتك ما ينسكت عنها وحنا صبرنا عليك ، بس انها توصل للحد اللي وصلتيي له خلاص محنب ساكتين ، هاتي رقم امك !

البنت ارتبكت يوم صاروا بيدقون على اهلها :/

عطتهم الرقم ودقوا عليها ..

- ما ترد !

- نايمه ، ما تقوم بدري

- طيب عطيني رقم احد غيرها

- ما حفظت الا رقم امي واختي

- هاتي رقم اختك

دقوا

- ماترد ..

رن الجرس وبدت الفسحه

- ممكن اطلع ؟ خلاص معد تبون فيني شيء

- اطلعي وبنناديك بعدين ..

طلعت البنت .. دقوا على ابوها

- السلام عليكم .. معك مدرسة بنتك فلانه .. الصراحه بنتك ما ينسكت عن حركاتها ، دايم مزعجه وكلن يشتكي منها ! واخر مره طيحت لوحه على استاذة ، وترانا دايم نسكت عنها ، بس توصل المسأله لحد انها تفصخ مريولها وتقعد ببنطلون وقميص ….. معد نقدر نسكت عن كذا ، لا وفاصخه مريولها كله ومآخذينه البنات يلوحون فيه !!

- …………

- طيب شكرآ ، مع السلامه .

- وش يقول ابوها ؟

- يقول خلاص اعتبروا الأمر منتهي .

حسيت ان الابو جته صعقات مفاجئة :/

وقولته اعتبروا الامر منتهي تخووف :#

بعد الفسحه وحده من صديقاتي عندها حصه لاولى .. وراحوا ثنتين بيحضرون لها

جتهم هالبنت تسألهم وحده وحده ..

- دقوا على ابوي ؟

- ما ادري .

- استاذه دقوا على ابوي ؟

- ايه دقوا

- وش قال ؟

- ما ادري بس دقوا ورد عليهم

<< حبت تخليها تستعد نفسيآ للي بيسويه ابوها :#

جتنا المراقبه قالت ان الحصه اللي بعد هذي عند ثاني علمي احتياط

من يمسكها ؟

انا بمسك ثاني علمي الاسبوع الجاي ان شاء الله

فـ كنت محتاره امسكهم اتعرف عليهم قبل الدرس ولا ما احتك فيهم !

قالت وحده تعالي بس نمسكهم انا وانتي والله عادي حبوبين

قلت طيب يلا مشينا

رحنا لقيناهم طالعين من الفصل

دخلتهم المراقبه

جو يدخلون ضايقه صدورهم

قالت وحده وهي تدخل

استااذه وش بتدرسونا ؟

- مب درس ، فراااغ استانسوا

- باللله حياااكم الله حيااااكم الله تفضلوووووا تفضلوووووا

ضحكت عليها ضحك اسلوبها مره يضحك

دخلناهم وبدت اسطوانة الاستئذانات

طبعآ كالعاده اطلعهم مسسستحيل اقول لهم لا

جوني بنتين قالوا بنقعد هنا بالسيب نذاكر

قلت ليش تذاكرون بالسيب ؟

قالوا الفصل ازعاااج ومدري ايش

وقعدوا يستعطفوني لين طلعتهم بشرط انه لو طلب احد غيرهم انه يطلع يدخلون ..

وجوني بنتين بيطلعون لاستاذه ، طلعتهم

فجأه اشوفهم تحت واقفين مع وحده بعدين راحوا يشترون يوم خلصوا رقوا

جت الاولى
قلت ما شااااااء الله ، قاعدين تمرمرون وتتقضون

قالت لااا بس ما لقينا الاستاذه ونزلنا لها ومرينا ع الطريق بس

قلت اهااا ما شاء الله ، وزميلتك وينها ؟ توها بالطريق ما وصلت ؟

قالت ايه بالطريق

ضحكت على اسلوبها ، مررره عادي عندهم ، من جد مدرستهم يتمشون على كيفهم ويمرمرون ويتقضون ويلعبون ويسوون كلش بدون شور احد

طلعوا ثنتين قالوا بنذاكر بالسيب

قلت لااا معليش خلص الفصل معد بقى احد ، بعدين فيه بنات يذاكرون بالسيب

قالوا والله عااااااادي مانزعج قسسسسسم بالله

وقعدوا يستعطفوني

وطلعتهم بنفس شرط اللي قبلهم < مخفه

جو بنتين كذا حبوباات ، قالوا بنروح لغرفة المصادر

قلت ليش ؟

قالوا بس نقعد هناك ع الكمبيوترات ولا نسولف مع الاستاذه

قلت لا لا خلااص والله مقدر كل الفصل طلع

قالوا تكفييين والله عادي غرفة المصادر نروح لها بحصص الفراغ والله مانلف ولا ندور

عييت اطلعهم

قالت تكفيييين يا استاذه والله انه بقلبك تقولين ايه والله

قلت والله ما ودي اقول ابي اطلعكم واخليكم على كيفكم بس مقدر مب شيء ضروري

وقعدت انا واياهم لييين وافقت اطلعهم

عاد طلعوا مسافة الطريق ورجعوا قالوا ان الاستاذه مب بالغرفه ..

جوني بنتين بعد بيذاكرون برا

قلت للي جالسين يلاا قوموا بموجب الشرط اللي بيننا

قاموا ثنتين وقعدوا بدالهم ثنتين

لهيت ، بعد شوي جت صديقتي

فجأة قالت صديقتي وين البنت الرابعه اللي كانت تذاكر هنا ؟

قلت مدري

قالت للبنات وين اللي معكم ؟

قالت صديقتها مدرررري

قالت وينها وش اللي ماتدرين ؟

قامت تستهبل وتستغبي على بالها ماتدري

لين حجرناها وخليناها تعترف انها قامت هجت

قالت بروح اناديها

راحت للدرج ووقفت عنده واشوفها تناديها تقول تعالي

وهذيك معييه تجي

يوم شفتها طولت عيت تجي ، جيت وقفت عند الدرج وقعدت اناظرها

اول ماجيت صرخوا هي واللي معها يوم شافوني : لاااااااااا جت

يوم شافتني احتريها ، جت

قلت لها يلااا ع الفصل لو سمحتي !

قالت لااااا بجلس برا اذاااكر

قلت لاااااااا معليششششش ياحبيبتي تلعبين على مين حلوة بجلس اذاكر ، على الفصل يله

قالت لاااا تكفين والله بجلس منيب قايمه

قلت لا معليش وشلون تبيني اثق فيك وانا تو مجلستك وواثقه فيك مخليتك على كيفك وآخر شيء تنزلين ؟ اسمحي لي مقدر ادخلي الفصل

قالت لاااا ما ابي

جت صديقتي قالت لااا لاااا ادخلي ما فيها كلاام

فجأة دق الجرس وخلصت الحصه

قالت صديقتي : احمدددي ربك جتك من الله الفكه

—

لقيت بنات المصلى بطريقي وانا راجعه وسلمت عليهم قلت تعالوا اوريكم عفش النشاط

صار عندهم حصه فراغ فـ قلطتهم عندنا بالغرفه وقعدنا نتاقش بالنشاط والاذاعه وكلش

ورحت لاستاذة المصلى وريتها عفشنا

وانتهى اليوم ورجعنا بيتنا :p

خخخخخ انا ووحده من صديقاتي طالعين بنروح للبيت

وحنا نمشي نسمع تعليقات البنات

فجأه قالت وحده لااااا ييييييييييعععع

قالت صديقتها ليششش والله انها احلىىى وحده فيهم

<< عاد من يقصدون مدري

فرحت انا يوم قالت احلى وحده فيهم ، بس يوم قالت الثانيه يييععع حسيتها تحطيم